Markmið næringarsviðs

Hlutverk næringarsviðs er að styðja við starfsfólk og vinna að stefnumótun í málum tengdum næringu og næringarmeðferð innan heilsugæslunnar á landsvísu sem og að sinna vísinda og gæðaþróunarverkefnum.

Um sviðið
Hvað er næringarfræði?

Óla Kallý Magnúsdóttir
næringarfræðingur

Jafnframt er hlutverk næringarsviðs að vinna að þverfaglegu samstarfi innan heilsugæslunnar með ýmiskonar fræðsluefni til næringarfræðinga, annarra heilbrigðisstétta og almennings um næringu og næringarmeðferð, gerð verklagsreglna sem og taka þátt í samstarfsverkefnum. Þá er hlutverk næringarsviðs að styðja við heilsueflandi móttökur heilsugæslunnar.

Helstu verkefni næringarsviðs 2020-2021

Vera leiðandi í þróun næringarmeðferðar innan heilsugæslunnar
Styðja við heilsueflandi móttökur heilsugæslunnar
Gera og uppfæra leiðbeiningar um næringu og næringarmeðferð fyrir ákveðna skjólstæðingahópa heilsugæslunnar
Vera með fyrirlestra á heilsugæslustöðvum fyrir starfsfólk um næringu og næringarmeðferð
Vinna að fræðsluefni til sjálfshjálpar fyrir almenning
Vinna að auknu samstarfi við Landspítalann í tengslum við næringarmeðferð ákveðinna skjólstæðingahóp.
Sinna vísindastarfi
Þar sem um nýja þjónustueiningu er að ræða er mikilvægt á næstum mánuðum að auka samstarf við aðrar heilbrigðisstéttir innan stofnunarinnar með ýmiskonar fræðsluefni um næringu og næringarmeðferð, gerð verklagsreglna sem og taka þátt í samstarfsverkefnum

Hvað er næringarfræði?

Næringarfræði er heilbrigðisvísindagrein sem fjallar að miklu leyti um líffræði mannsins, heilsu og næringu. Næringarfræði fjallar m.a. um næringarþörf heilbrigðra og sjúkra, næringarþörf á mismunandi æviskeiðum, í þróuðum og þróunarlöndum. Einnig fjallar hún um matvæli og fæðutengd efni, hollustu og hættu þeirra og áhrif á líkamsstarfsemi. Þar að auki tekur næringarfræði mið af umhverfinu og sjálfbærri nýtingu. Mismunandi áherslur eru í næringarfræði og má þar nefna lýðheilsunæringarfræði, klíníska næringarfræði, íþróttanæringarfræði og áherslu á rannsóknir og vísindi.

Hvað gera næringarfræðingar?

Næringarfræðingar hafa hæfni til að starfa í heilbrigðisþjónustu, að forvörnum og stefnumótun, heilsueflingu, næringarmeðferð, fræðslu og kennslu, við gæðaeftirlit og vöruþróun auk verkefna- og rannsóknarvinnu.

Næringarfræðingar sem starfa við heilbrigðisþjónustu sinna margvíslegum verkefnum og sjúklingahópum. Þeir vinna mikið í samvinnu við aðrar fagstéttir og í þverfaglegum teymum. Markmið næringarmeðferðar er almennt að bæta eða viðhalda heilsu og vellíðan einstaklingsins til bæði skemmri og lengri tíma, tryggja næringarefnaþörf og bæta lífsgæði. Næringarmeðferðir eru einstaklingsmiðaðar og taka mið af sjúkdómsástandi og næringarástandi hverju sinni.

Næringarfræðingar sem starfa við heilbrigðisþjónustu sinna ýmsum sjúklingahópum, s.s. einstaklingum sem glíma við sykursýki, krabbamein, nýrna-, lungna- og hjartasjúkdóma, meltingarfærasjúkdóma, kyngingartregðu, vannæringu og offitu, taugasjúkdóma, geðraskanir eða einstaklingum sem nærast um slöngu, eru í endurhæfingu eða með fæðuofnæmi eða fæðuóþol. Þar að auki sinna þeir börnum, barnshafandi konum og öldruðum.