Fylgihlutir og svefnöryggi

Regnplöst, flugnanet og stykkir/teppi fyrir opum barnavagna og kerra

Regnplöst sem eru seld með barnavögnum og kerrum eða ein sér þurfa ekki að uppfylla öryggisstaðla. Bent hefur verið á nauðsyn þess að hafa staðla, en vinna við það er ekki hafin í Evrópu. Þetta er mjög brýnt þar sem norskar og sænskar rannsóknir sýna fram á að loftgæðin í vögnum eru hættuleg ef ákveðnar gerðir regnplasta eru notaðar fyrir opið. Við þetta getur skapast hætta ef börn eru skilin eftir eftirlitslaus í vögnum þar sem mikil hætta er á enduröndun sem leitt getur til dauða þeirra. Í sömu rannsóknum kom einnig í ljós að hitastig inni vögnunum varð mjög hátt þrátt fyrir að kalt væri í veðri en slíkt getur leitt til ofhitunar sem ungbörn eru mjög viðkvæm fyrir og getur leitt til dauða þeirra.

Öruggu regnplöstin hylja aðeins vagninn sjálfan eða kerruna og eru ekki fyrir vagnopinu. Opið á skermunum er til að tryggja að barnið fái ferskt loft. Það má ekki setja neitt fyrir opið sjálft nema flugnanet.

Flugnanet er ekki öruggt í notkun ef hitastigið utandyra er komið yfir 15 gráður og stillt er í verðri, þar sem það getur haft áhrif á að hitastigið inni í vagninum hækki hættulega mikið.

Teppi og stykki. Aldrei má setja neitt fyrir op á barnavögnum annað en flugnanet. Barnavagninn er hannaður með tilteknu opi til a lofti vel um barnið og að súrefnisflæðið sé fullnægjandi.

Mikilvægt er að kenna foreldrum að meta hvort ungbarninu sé of heitt eða kalt. Hér á landi er algengt að klæða börn í mörg lög þegar farið er með þau út að ganga og oft á tíðum eru notaðir svefnpokar sem eru framleiddir fyrir hátt kuldastig en barnið er jafnframt í útigalla og flís eða ullarfatnaði undir.

Einfaldasta ráðið að kenna foreldrum til að kanna hvort barninu sé of heitt eftir er að kanna hvort það sé sveitt á hálsi og höfði eða baki og maga. Ef svo er er barninu of heitt í þessum klæðnaði og foreldrar þurfa að endurskoða klæðnað barnsins miðað við það hitastig sem var úti þegar þetta gerðist. Einnig er æskilegt að benda þeim á að hendur og fætur barna eru kaldari en kjarni líkamans fyrstu mánuðina því blóðrásin er að þroskast og því er ekki hægt að nota það sem viðmið.

Benda þarf foreldrum á að ef þeir þurfa að bregða sér inn með barn í vagni að vetrarlagi þegar það er kappklætt í vagninum að það sé einungis í mjög stuttan tíma. Ef um lengri dvöl er að ræða en 5 til 10 mínútur þurfi að fækka fötum barnsins.

Snuðkeðjur

Snuðkeðjur þurfa að standast staðalinn EN 12586. Talsvert er af snuðkeðjum í umferð sem ekki standast gildandi staðli. Mikilvægt er að fylgja ávallt leiðbeiningum framleiðanda um um rétta notkun þeirra. Aldrei má nota snuðkeðju þegar barnið er lagt til svefns.

Hárbönd

Börn eiga aldrei að sofa með hárbönd, klúta eða annað hárskraut. Ekki er mælt með notkun þessarar vöru fyrir börn undir eins árs.

Leikföng, óróar og fleira

Ekki er æskilegt að láta barn undir 1 árs aldri sofa með mjúk leikföng eða annan búnað sem notaður er til að svæfa barnið. Mikilvægt er að fjarlægja leikfang um leið og barnið hefur sofnað. Ekki skal festa skrautmuni, geymslupoka, ljósaseríur, eða annað á vöggu eða ungbarnarúm. Ef notaðir eru óróar er mikilvægt að fylgja leiðbeiningum framleiðanda um rétta notkun. Framleiddir eru tvær tegundir af óróum, þeir sem festa á í loftið yfir vöggu/ungbarnarúmi og óróar sem festa á við kant vöggunnar/rúmsins. Óróar sem festir eru við rúmið geta verið hættulegir ef þeir eru notaðir of lengi. Þegar barnið er farið að fara upp á hnén á að fjarlægja hann.

Himnasængur

Ekki er mælt með notkun þeirra þar sem alvarleg slys hafa orðið s.s. næstum hengingar eða hengingar. Yfirleitt um er um þunn efni að ræða og auðvelt getur reynst fyrir barnið að draga það inn í vögguna sem með þeim afleiðingum að það getur hegnst kafnað þegar efnið vefst um háls þess.

Ljósaseríur og lampar

Aldrei má hengja ljósaseríur á ungbarnarúm og vöggur. Hengingarhætta getur skapast ef barnið nær að draga seríuna að sér. Ef vagga eða ungbarnarúm er staðsett við vegg þá þarf að gæta þess að engar snúrur úr lömpum séu nálægt.