Ráðleggingar um mataræði fyrir fólk með sykursýki af tegund 2 eru að miklu leyti þær sömu og fyrir fólk almennt, en þær fela í sér að borða holla og fjölbreytta fæðu í hæfilegum skömmtum. Áherslan er á matvæli sem eru næringarrík frá náttúrunnar hendi, eins og grænmeti, ávexti, ber, hnetur, fræ, heilkornavörur, baunir, linsur, jurtaolíur, hreinar mjólkurvörur, fisk og kjöt. Vatnið er ávallt besti valkosturinn til drykkjar.

Fræðsluefni fyrir einstaklinga með sykursýki af tegund 2: íslenska, enska, pólska

Við skipulag máltíða er gott að hafa í huga að um helmingur af disknum sé grænmeti og/eða ávextir, fjórðungur gróft brauð, kartöflur, bygg, hýðishrísgrjón eða aðrar heilkornavörur og fjórðungur próteinrík matvæli svo sem fiskur, kjöt, egg eða baunir.

Regluleg hreyfing ætti að vera hluti af meðferðaráætlun allra sykursýkisjúklinga.               

Því fylgir margt jákvætt, þ.m.t. bætt sykurstjórnun, m.a. gegnum aukið insúlínnæmi. Þessi áhrif sjást jafnvel þótt viðkomandi léttist ekki. Kviðfita minnkar og vöðvamassi eykst. Einnig sjást jákvæð áhrif á blóðfitu.1  Síðast en ekki síst ber að nefna það sem allir kannast við, aukið þrek og þol og með því betri líkamleg og andleg líðan. Einstaklingurinn tekur með þessu móti virkan þátt í eigin meðferð og finnur hvernig hann nær meiri stjórn á sjúkdómi sínum um leið og  árangurinn kemur ljós, og það ætti aftur að hvetja til frekari árangurs.

Hreyfing er mikilvægur hluti af meðferð við mörgum algengum sjúkdómum svo sem sykursýki, háþrýstingi, þunglyndi, kvíða, verkjum, ofþyngd eða öðrum lífsstílstengdum vandamálum.

Telji læknar eða aðrir heilbrigðisstarfsmenn að hreyfing ætti að vera hluti af meðferð við þínum sjúkdómi er þér vísað til hreyfistjóra sem er sjúkraþjálfari með aðsetur á heilsugæslunni þinni. Þú getur einnig haft frumkvæði að því að óska eftir tilvísun á hreyfiseðil.

Ávísun í hreyfiseðill felur í sér einnar klukkustundar viðtalstíma hjá sjúkraþjálfara þar sem farið er í gegnum heilsufarssögu, sjúkdómseinkenni og hreyfivenjur. Sett eru upp markmið og hreyfiáætlun út frá þinni getu að teknu tilliti til ákveðinna heilsufarsmælinga, sjúkdóma og heilsuvanda. Út frá þessu færðu ráðleggingar um tegund hreyfingar, magn, ákefð og tímalengd.

Þú skráir hreyfingu þína rafrænt eða símleiðis og færð hvatningu og aðhald með tölvupóstum eða símtölum. Á þriggja mánaða fresti fær læknir / heilbrigðisstarfsmaður greinargerð frá hreyfistjóra þar sem mat er lagt á framvindu og árangur meðferðarinnar. Meðferð getur varað í eitt ár allt eftir óskum þínum og er þér að kostnaðarlausu að undanskildu viðtalinu þar sem greitt er komugjald.